ހުޅުމާލެ ފޭސް އެކަކަށް އަދި ފޭސް ދޭއްގެ ބައެއް ސަރަހައްދުތަކަށް ކަރަންޓު ދީފިއެވެ.
މިއަދު ހެނދުނު 9:30 ހާއިރު މާލެ އަދި ހުޅުމާލެ ސަރަހައްދުން ކަރަންޓުގެ ޚިދުމަތް ވަނީ މެދުކެނޑިފައެވެ. ސްޓެލްކޯއިން މަޢުލޫމާތު ދެއްވާފައިވާ ގޮތުގައި މި މައްސަލަ ދިމާވެފައިވަނީ ޓެކްނިކަލް މައްސަލައަކާ ގުޅިގެންނެވެ.
މިއަދު ހެނދުނު މުޅި މާލޭ ސަރަހައްދުން ކަރަންޓު ކެނޑުމަށްފަހު، ސްޓެލްކޯއިން ހުޅުމާލެ ފޭސް 1 އަދި ފޭސް 2 ގެ ބައެއް ސަރަހައްދުތަކަށް ކަރަންޓުގެ ޚިދުމަތް އަލުން ފޯރުކޮށްދީފިއެވެ.
ސްޓެލްކޯއިން މަޢުލޫމާތު ދިން ގޮތުގައި، ހުޅުމާލެ ފޭސް 1 ގެ މުޅި ސަރަހައްދަށް މިހާރު ވަނީ ކަރަންޓުގެ ޚިދުމަތް ފޯރުކޮށްދެވިފައެވެ. އަދި ފޭސް 2 ގެ ގިނަ ސަރަހައްދުތަކަށް ވެސް ކަރަންޓުގެ ޚިދުމަތް ލިބެމުންދާ ކަމަށް އެ ކުންފުނިން ބުނެފައިވެއެވެ.
ކަރަންޓު ކެނޑުމުގެ މައްސަލައިގައި އަދިވެސް ކަރަންޓު ނުލިބޭ ސަރަހައްދުތަކަށް ވީހާވެސް އަވަހަކަށް ޚިދުމަތް ފޯރުކޮށްދިނުމަށް ސްޓެލްކޯގެ ޓެކްނިކަލް ޓީމްތަކުން ދަނީ މަސައްކަތް ކުރަމުންނެވެ.
މި މައްސަލައާ ގުޅިގެން ރައްޔިތުންނަށް ކުރިމަތިވި ދަތިތަކަށް ސްޓެލްކޯއިން ވަނީ މަޢާފަށް އެދިފައެވެ. އަދި މައްސަލައިގެ އިތުރު އަޕްޑޭޓްތައް ވަގުތުން ވަގުތަށް ހިއްސާކުރާނެ ކަމަށް ވެސް އެ ކުންފުނިން ބުނެފައިވެއެވެ.
ކުރިން ކަރަންޓު ކެނޑިފައިވާ މާލޭގެ ބައެއް ސަރަހައްދުތަކަށް ވެސް މިހާރު ވަނީ ކަރަންޓުގެ ޚިދުމަތް އަލުން ފޯރުކޮށްދެވިފައެވެ. އަދި ބާކީ ހުރި ސަރަހައްދުތަކަށް ވެސް އަވަހަށް ކަރަންޓު ލިބޭނެ ކަމަށް ސްޓެލްކޯއިން އުއްމީދުކުރާ ކަމަށް ބުނެފައިވެއެވެ.
