ސްޓޭޓް އިލްކެޓްރިކް ކޮމްޕެނީ ލިމިޓެޑްގެ މެނޭޖިން ޑިރެކްޓަރަކަށް އެ ކުންފުނީގެ ޑެޕިޔުޓީ މެނޭޖިން ޑިރެކްޓަރުގެ މަގާމުގައި ހުންނެވި ޑރ. އަލީ އަޒްވަރު އައްޔަން ކުރައްވައިފިއެވެ.
ސްޓެލްކޯގެ މެނޭޖިން ޑިރެކްޓަރަކަށް ޑރ. އަޒްވަރު އައްޔަން ކުރެއްވީ މިއަދެވެ.
ޑރ. އަޒްވަރަކީ ހަކަތައިގެ ދާއިރާގައި ދިގު މުއްދަތަކަށް ހިދުމަތް ކުރައްވާފައިވާ، އަދި ހަކަތައިގެ ދާއިރާގެ ސިޔާސަތުތައް އެކުލަވައިލުމުގެ ތަޖުރިބާކާރު ބޭފުޅެކެވެ.
ސްޓެލްކޯގައި ވިހި އަހަރަށްވުރެ ގިނަ ދުވަހު ހިދުމަތް ކުރައްވާފައިވާ ޑރ. އަޒްވަރުއަކީ ސްޓެރެޓެޖިކް ލީޑަރޝިޕް، އޮޕަރޭޝަންސް، ފައިނޭންސް، އަދި ބިޒްނަސް ޑިވެލޮޕްމަންޓްގެ ދާއިރާއިން އޭނާ ހާސިލުކުރައްވާފައިވާ ތަޖުރިބާގެ އަލީގައި، ރާއްޖޭގެ މައިގަނޑު ކަރަންޓު ހިދުމަތްދޭ ކުންފުނީގެ މިސްރާބު ކަނޑައެޅުމުގައި އޭނާ މުހިންމު ދައުރެއް އަދާކުރައްވާފައިވާ ބޭފުޅެކެވެ.
ޑރ. އަޒްވަރު ސްޓެލްކޯއާ ގުޅިވަޑައިގަތީ 1997 ވަނަ އަހަރު ޓްރޭނީއެއްގެ ގޮތުގައެވެ. އެއަށްފަހު، ކުންފުނީގެ ފަންނީ އަދި އިދާރީ އެކި ފަންތީގެ މަގާމުތައް ފުރުއްވަމުން ގޮސް، އޭނާ ވަނީ ސޭލްސް އެންޑް މާކެޓިންގ، ބިލިންގ ސާވިސަސް، އަދި ބިޒްނަސް ޑިވެލޮޕްމަންޓް ފަދަ މުހިންމު ދާއިރާތައް އިސްވެ ހިންގަވާފައެވެ. ޑެޕިއުޓީ މެނޭޖިންގ ޑައިރެކްޓަރުގެ މަގާމާއި، އޭގެ ކުރިން އަދާކުރެއްވި ޗީފް އޮޕަރޭޓިންގ އޮފިސަރުގެ (ސީއޯއޯ) މަގާމުގައި ހުންނަވައިގެން، ކުންފުނީގެ ހިންގުން ހަރުދަނާކުރުމަށާއި، ރާއްޖޭގެ ހަކަތައިގެ ބޭނުންތަކަށް އެކަށޭނަ ސިޔާސަތުތައް އެކުލަވައިލުމަށް އޭނާ ގިނަގުނަ މަސައްކަތްތަކެއް ކުރައްވާފައިވެއެވެ.
