ގަނެވިއްކުމުގެ މުއާމަލާތްތައް ވަރަށް ފަސޭހައިން ބާތިލް ކުރާތަން ދަނީ ފެންނަމުންނެވެ. އަދި ދެފަރާތުންވީ އެއްބަސްވުންތަކަށް ބޭވަފާތެރިކަން ވަންނަނީ ނުހަނު އަވަހަށެވެ. މިއީ މުޖުތަޢުގެ އާއްމު މައްސަލައަކަށް ވެފައިވާ ކަންބޮޑުވާންޖެހޭ ކަމެކެވެ. ދޭދޭ ފަރުދުންގެ މެދުގައި ކުރެވޭ މުއާމަލާތްތަކުގައި އިތުބާރާއި ޔަގީންކަން ގާއިމު ކުރަންޖެހެއެވެ. އަޅުގަނޑުމެންގެ ރަސޫލާ މުޙައްމަދު ޞައްލަﷲ ޢަލައިހި ވަސައްލަމަ ގަނެވިއްކުން ސިފަކުރައްވަމުން އަންނަނިވި ވާހަކަފުޅު ބަޔާންކުރައްވާފައިވާކަން ހަރުކަށިކޮށް ޞައްޙަވެގެންވެއެވެ.
"އެހެންކަމުން ދެފަރާތުން ތެދުވެރިވެ ސާފުވެއްޖެނަމަ، ދެން އެމީހުންގެ ވިއްކުމުގައި ރަހުމަތް ލައްވާފައިވެއެވެ." އަދި [ވިއްކާ އެއްޗެއްގެ ނުވަތަ ފައިސާ ދެއްކުމުގެ ކަންތައްތައް ފޮރުވައި، ނަޒާހަތްތެރިކަން ގެއްލިއްޖެނަމަ، އެމީހުންގެ ވިޔަފާރިން ބަރަކާތް ކެނޑިގެން ދެއެވެ." [ބުޚާރީ، މުސްލިމް]
ވީމާ، ވިޔަފާރީގެ ހުރިހާ މުއާމަލާތެއްގައި، ވަކިން ޚާއްޞަކޮށް ގަނެވިއްކުމުގެ އެއްބަސްވުމާ ގުޅޭ ރިވާޔަތްތަކުގައި ނަމަވެސް، ވަޒީފާދޭ ފަރާތާއި މުވައްޒަފާއި ދެމެދު ނުވަތަ ކުއްޔަށް ދޫކުރާ ކުއްޔަށްހިފާ އެއްބަސްވުން ހިމެނޭ ގޮތަށް ހުރިހާ ބާވަތެއްގެ މާލީ މުޢާމަލާތްތަކެއްގައިވެސް އާންމު އުސޫލު ދަމަހައްޓަންޖެހެއެވެ. މުއާމަލާތްތައް ސާފުވާނެހެން ހާމަކަން ބޮޑު ގޮތެއްގައި ކުރިއަށް ގެންދިއުމާއި، އެކަމުގައި ދެ ފަރާތުން ވެސް ފުރިހަމައަށް ތެދުވެރިވާން ޖެހެ އެވެ. ޙަދީޘްގައި ބަޔާންކޮށްފައިވާ ފަދައިން މިފަދަ މުޢާމަލާތުގައި الله ސުބުހާނަހޫ ވަތަޢާލާގެ ނިޢުމަތާއި ރަހުމަތުގެ ދޮރު ހުޅުވުމުގެ ތަޅުދަނޑިއެވެ. މުއާމަލާތުގައި ނަޒާހަތްތެރިކަން ކުޑަކަމާއި ފޮރުވުމާއި، ހީލަތްތައް ހިމެނުމުން އެ ނިޢުމަތް ނެތުމަށް މަގުފަހިވެއެވެ. އެހެންކަމުން ކުރާ މުޢާމަލާތުގައި ސާފު އަދި ސައްޙަކަން ހުރިތޯ ޔަޤީންކުރުމުގައި ސަމާލުކަން ދޭންޖެހެވެ. މީގެ އިތުރުން މާ ގޮތްބޮޑުނުކޮށް ކަންތައް މެދުމިންވަރެއްގައި ކުރަންޖެހެއެވެ.
މާލީ މުއާމަލާތްތަކުގެ އަނެއް އާންމު އުސޫލަކީ ތިމާގެ މުއާމަލާތްތަކުގައި ހަރުދަނާކަމާއި އިހުސާންތެރިކަން ދެމެހެއްޓުމެވެ. އަޅުގަނޑުމެންގެ މުޅި ދީން ބިނާވެފައިވަނީ އިހުސާންތެރިކަމުގެ މައްޗަށެވެ. އެއީ ﷲ ސުބުހާނަހޫ ވަތަޢާލާ ކޮންމެ ކަމެއް ބައްލަވާވޮޑިގެންވާކަން ދަނެ ތެދުވެރިކަމާއެކު ކަންކަން ކުރުމެވެ. އެއީ މުއުމިނާގެ ސުލޫކު އަމިއްލައަށް އަދި އާންމުކޮށް، އެކަލާނގެ ޚާލިޤުވަންތަ ރަސްކަލާނގެއާއެކުވެސް އަދި ހުރިހާ ޚަލްޤުތަކުންވެސް އަންގާ ހެޔޮ ސިފައެކެވެ. މާތްالله ތަކުރާރުކޮށް ޤުރުއާނުގައި އިހުސާންތެރިންނަށް ތަޢުރީފު ކުރައްވާފައިވެއެވެ. އަދި އެކަމަށް އަޅުގަނޑުމެންގެ ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަ ވަރަށްބޮޑަށް ބާރުއަޅުއްވާފައިވެއެވެ. ވީމާ ހުރިހާ ކަމެއްގައި ވެސް އިހުސާންތެރިވާށެވެ.
ކޮންޓްރެކްޓްތަކަކީ އެހެން މީހުންގެ މާލީ ހައްގުތަކާ ގުޅޭ ވާޖިބުތަކެއް ކަމަށްވާތީ ހަމައެކަނި އެ ހައްގުތައް ފުރިހަމަ ކުރުމުގެ އިތުރުން އެކަން އެންމެ ރަނގަޅަށް އަދާ ކުރަން ޖެހެއެވެ. މާލީ މުއާމަލާތްތަކުގައި މި ހެޔޮކަން ވިސްނައިފިނަމަ، އެއިން ގިނަ ނިޢުމަތްތަކެއް ދެފަރާތަށްވެސް ލިބިގެންދާނެއެވެ.
އަދި ކާމިޔާބީ ދެއްވަނީ ހަމައެކަނި الله އެވެ.
