އިންސާނާގެ ހަޔާތުގައި އެންމެ މުހިންމު އެކައްޗަކީ ވަގުތެވެ. ދުނިޔެވެސް އަދި އާޚިރަތްވެސް ކާމިޔާބުކުރެވެން އޮތީ ވަގުތަށް ޙުރުމަތްތެރިކޮށްހިތިވަރަކުންނެވެ.
ހަމައެކަނި ނަމާދުކުރުމަށް ބަލައިލި ނަމަވެސް މިބުނި ބަހުގެ ދަލީލު ލިބިގެންދާނެއެވެ. ވަގުތު ޖެހުމުގެ ކުރިން މިސްކިތަށް ގޮސްހުރުމުންނާއި ޖަމާޢަތުގައި ބައިވެރިވުމުން ދެއްވަވާ ޘަވާބު އެތައް ގުނައަކަށް އިތުރުކުރައްވަވާތީއެވެ.
ފާހަގަކޮށްލަން މިއުޅެނީ ކުޑަކޮށް ތަފާތު ކަމެކެވެ. ކަންކަމުގައި ފަރުވާކުޑަކަމުންގޮސް އެންމެ ބޮޑަށް ބޮއްސުންލާފައި އޮތް އެއް ކަމަކީ ވަގުތަށް ޙުރުމަތްތެރިކޮށް ހިތުމެވެ. މީހުންނަށް ގަޑިކިޔާފައި ގަޑިއަށް ހާޒިރުނުވުން މިހާރު މިވަނީ ވަރަށް ޢާންމު ކަމަކަށްވެފައެވެ.
ކިތަންމެ ބޮޑަށް ޢާންމުވެފައި އޮތްކަމެއް ނަމަވެސް އެއީ ވަރަށް ނުބައި އާދައެކެވެ. އެއާދަ އެމީހެއްގެ ކިބައިގައި ހުރިނަމަ އަންގައިދެނީ އެމީހަކީ އެއްވެސް ހަރުދަނާ ކަމެއް ނެތް ދޯދިޔާ މީހަކު ކަމެވެ. އެމީހުންގެ އެހެން ޢަމަލުތަކުގައިވެސް އެއްވެސް ހަރުދަނާކަމެއް ނުހުންނާނެ ކަމެވެ.
ކައިވެނީގެ ކުރިން ލޯބިވެގެން އުޅޭ ދުވަސްވަރުގައިވެސް ބައެއް މީހުންގެ ކިބައިން މިބުނި ސިފަ ފެނެއެވެ. ގަޑިއަށް ފަރުވާކުޑަކުރެއެވެ. އަނެކާއަށް އިންތިޒާރުކުރުވަން ޖައްސުވައެވެ. އަދި ބައެއް ފަހަރު ބައްދަލުވުން ކެންސަލްވެސް ކުރެއެވެ.
މީގެ އިތުރުން ވަޒީފާގައި އުޅޭއިރު ގިނައިން ގަޑިޖެހޭ، ގިނައިން ސަލާންބުނާ މީހުންނަށްވެސް ސަމާލުވާށެވެ! އެމީހުންނަކީވެސް ހަރުދަނާކަމެއް ނެތް މީހުންނެވެ. ކަންނެތް މީހުންނެވެ.
އަހުރެން ބުނާނީ އެމީހެއްގެ ކިބައިގައި މިސިފަތައް ހަރުލާފައި ހުންނަ މީހަކާއި ކައިވެނި ނުކުރުމަށެވެ. ސަބަބަކީ އެސިފަ ހުންނަ މީހަކީ ހަރުދަނާ މީހަކަށް ނުވާނެތީއެވެ. ހަރުދަނާ ކަމެއް ނެތް މީހަކާއި ކައިވެނިކޮށްގެން އުފާވެރި ޒަވާޖީ ޙަޔާތެއް ނުލިބޭނެތީއެވެ.
