ރާއްޖޭގެ ތާރީޚުގަައިވެސް ކުރު މުއްދަތެއްގެ ތެރޭގައި އިސްލާމީ އެންމެ ގިނަ މަޝްރޫއުތައް ހިންގަމުންދަނީ މި ދައުރުގެ ތެރޭގައި ކަމަށް އިސްލާމީ ކަންތައްތަކާއި އަޢުޤާފާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު މިހެން ވިދާޅުވީ އިސްލާމީ ކަންތައްތަކާބެހޭ ވުޒާރާއިން ކުރަމުން އަންނަ މަސައްކަތްތަކާގުޅޭ ގޮތުން ރައްޔިތުންގެ މަޖިލީހުގެ މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.
މިހާރުވެސް އިސްލާމީ ކަންކަމާ ގުޅުންހުރި 81 އަށްވުރެ ގިނަ މަޝްރޫޢުގެ މަސައްކަތް ކުރިއަށްދާކަން ފާހަގަކުރައްވައި ވަޒީރު ވިދާޅުވީ މިއީ ރާއްޖޭގެ ތާރީޚުގައިވެސް ކުރު މުއްދަތެއްގެ ތެރޭގައި އިސްލާމީ އެންމެ ގިނަ މަޝްރޫޢުތައް ކުރިއަށްގެންދާ ދައުރު ކަމަށެވެ. ސަރުކާރުގެ އަމާޒަކީ ކުރިމަތިވާ ގޮންޖެހުންތަކާއެކުވެސް ހުރިހާ މަޝްރޫއުތަކެއްގެ މަސައްކަތް ނިންމުން ކަމަށްވެސް ވިދާޅުވިއެވެ.
އިސްލާމީ ކަންތައްތަކާއި އަޢުޤާފާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ އިސްލާމީ މަރުކަޒުތަކާއި މިސްކިތްތަކާއި ވަޤުފު އިމާރާތްތައް ބިނާކުރުމުގެ މަޝްރޫއުތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ އިސްކަމެއް ދެއްވައިގެން ކުރިއަށްގެންދިއުމަށް ނިންމަވާފައިވާ މަޝްރޫޢުތަކެއް ކަމަށެވެ. އެގޮތުން، އެމަނިކުފާނުގެ ސަރުކާރުން ފައްޓަވާފައިވާ އައު މަޝްރޫއުތަކާއި ކުރީ ސަރުކާރުން ފަށައި، މަޑުޖެހިފައި ހުރި މަޝްރޫޢުތަކުގެ މަސައްކަތްތައްވެސް ކުރިއަށްގެންދާ ކަމަށް ވިދާޅުވިއެވެ.
ވަޒީރު ވަނީ ކުރީ ސަރުކާރުން ފެށި ބައެއް މަޝްރޫއުތައް ލަސްވެފައިވާ މައިގަނޑު ސަބަބުތައްވެސް ހާމަކުރައްވާފައެވެ. އެގޮތުން، ރިޔާސީ އިންތިޚާބާ ދިމާކޮށް ކުރީ ސަރުކާރުން ބަޖެޓުގައި ފައިސާ ނުހިމަނައި ގިނަ މަޝްރޫއުތަކެއްގެމަސައްކަތް ފެށި ކަމަށާއި ބައެއް މަޝްރޫއުތައް ހަވާލުކޮށްފައިވަނީ އެންމެ ގާބިލުނޫން ކުންފުނިތަކާކަމަށް ވިދާޅުވިއެވެ.
އެ މަޝްރޫއުތަކަށް ބޭނުންވާ ފައިސާ ހަމަޖައްސައި، މަޝްރޫއުތައް ނިންމަވާނެ ކަމުގެ ޔަގީންކަންވެސް އިސްލާމީ ކަންތައްތަކާއި އަޢުޤާފާބެހޭ ވަޒީރު ދެއްވިއެވެ.
